الأسرار

9/27/2010 Marcell 4 Comments






Secret Bear by ~capsicum


اول شي سرقت هادا الواجب التدويني من ( مو مشكلة )
الهدف .. هو :" أن تذكر ستة أسرار لا يعلمها الآخرين عنك ، و أن تقوم فيما بعد بتمرير الواجب إلى ستة مدونين آخرين "

مقدمة لا بد منها :
بما أني من المؤمنين بشدّة بأهمية المشاركة بحياة البشر وبالعلاقات .. وإلخ ، وجدت صعوبة جمة بأني ألاقي ست أسرار قد لا يعلمها الآخرون عني ، لهيك شدني هادا الواجب التدويني ( وبصراحة اكتر من الواجب التدويني المتعلق بالكتب .. اللي رح أرجعلو بوقت لاحق .. لأنو أسهل عليي كتير )
رح حاول أبحث عن ست أسرار
الأول - أني جبانة
عموما ً بيتوقع الناس عني أني قلبي قوي ( كام مرة كتبتلكن مساوئ التوقعات المسبقة - هي احداها ) بس أنا عكس هيك تماما
بخاف من الارتفاع جدا جدا ، بخاف من الطيور .. الصبح وقت بنزل من البيت ممكن استناها خمس دقايق لتطير لحالا ولا بقرب منها
بخاف من أفلام الرعب ، ما بقدر تابع فيلم رعب بشكل متواصل ، ما بقدر نام وبخاف نظامي ..

الثاني - بنسى الأسماء بشكل كبير
بمتلك ذاكرة دراسية أحسد عليها ، وبعتمد عليها بشكل كبير بالدرس وبالتفاصيل وبمعظم أمور حياتي .. لكني بنسى الناس ، حتى الأشخاص اللي بيضلو معي سنين
اصدقاء الطفولة ، اصدقاء المدرسة ، اللي كانوا معي من زمان بجمعية ، لك حتى رفقاتي بالكلية .. غالبا ً بصير بسلم علين
مرحبا يا حلوة ، كيفك يا زلمي وينك ما عم نشوفك ؟، اهلا يا زميل ( هاهاها ) ، كيفك يا دكتور ؟

الثالث - إني بعثية
سنكتفي بهذا القدر من الشرح ونترك الباقي لخيال القارئ

الرابع - إني مهملة صحيا ً
ما بحب روح عند دكتور ، حتى لو كنت مرضانة .. وبهمل صحتي كتير كتير كتير

الخامس -إني بحب لعب البنات
اي عندي سوسة بلعب الفايس بوك والكومبيوتر تبع الفاشن .. ( نهفة .. اهتممام غير متناسق مع باقي اهتماماتي )

السادس - بحب التدريس
من الأشيا اللي كتير بحبا بالحياة تعليم الولاد الصغار وخاصة رياضيات ( يمكن لأني بحس انو كل الناس لازم تحب الرياضيات ) وقت كان عندي وقت اكتر.. كنت كل سنة ادرس طالب وكانت خبرة ممتعة



بدك تتجسس على أسرار مجموعة تانية من المدونين .. فهون هني ..
رتروت ..
مو مشكلة
مدونة لبنى
ومآرب أخرى
مدونة فضل
مدونة ريم
همسات المساء
Hanan
كلام
Sh
زهرة إبريل
إذا كان في غير.. مدونين فيعذروني ما التقى معي إلاهدول ( الحق ع جوجل .. )