كلما حبات المطر غازلت أرض بلادي
وعصفور اللي عالشجر بصوتو عالشمس ينادي
بتخلق معن الموسيقى
كلما صوتك يحكي عني
وتهرب أنفاسي مني
بتخلق معن الموسيقى
صوت زقفة الإيد بالإيد
وضحكة طفلة يوم العيد
بتخلق معن الموسيقى
غنوا معنا والصوت يعلا
بالحب وحدو هالكون بيحلا
غنوا
خلوا هالماضي لهمّو
وللأمل اللي جاية ابتسموا
غنوا
لما النسمات بتداعب عالشجر الوراق
ولحن البوسة ع شفاف العشاق
والنهر الراجع للبحر مشتاق
هيدي كلها موسيقا
الطفل اللي بيكاغي لأمو
دمع الحزين بيشكي همو
نبضات قلب عاشق ، عالحب بيرقص دمو
هيدي كلها موسيقا
رفة علمنا عالعالي
ودقة اصابيع الناطر الغالي
صرخة الحرية ببالك وبالي
هيدي كلها موسيقا
مهما كانت أيامنا مرّة
هالعمر منعيشوا مرّة
غنوا
شو بتفرق ؟ شو دينك لونك
نغم الحب بيوحد كونك
غنوا
-----------
- كنا راجعين من حمص ’، أنا ورفقاتي والكل نايم بالباص
وكان المطر عم يضرب شباك الباص الراجعين فيه
وضو ما في ..
هيك خلقت هالغنية
- عم نفكر نبيعها .. وتتغنى ( هي من أوائل تجاربي للكتابة بالعامية .. لنشوف إذا بيمشي الحال )
2 التعليقات:
بيمشي الحال و نص ^^
حلوة الكلمات و المعاني كمان حلوة
تجربتك الاولى تستحق النشر ... كيف لو واصلتي النظم و المحاولة ...
غني يا مرسيل
دمت
aboyassin
أهلا فيك منور أول شي
لسى في واسطات بيني وبين مجموعة شباب سوريين
لنشوف كيف بدها تنتهي
انشالله بتتغنى
إرسال تعليق